UzAuto Motors Powertrain заводида янги қуйиш цехи очилди 2024 йил 24 декабрда UzAuto Motors Powertrain заводида юқори босимда қуйиш (HPDC) ёрдамида двигател блокларини ишлаб чиқаришга иҳтисослашган янги қуйиш цехининг расмий ишга тушириш маросими бўлиб ўтди.

Ушбу лойиҳа автомобилсозлик саноатини ривожлантиришда муҳим қадам бўлиб, импортга боғлиқликни камайтириш ва маҳаллий ишлаб чиқариш мавқеини мустаҳкамлаш имконини беради. Ушбу блоклар Chevrolet Оних ва Chevrolet Tracker автомобилларига ўрнатилган янги CSS Prime двигателларини йиғиш учун ишлатилади. Бундан ташқари, компания CSS Prime двигателлари учун 1,2 литрли LIH силиндрли блокларини Мексиканинг Ramos шаҳридаги GM заводининг конвейерларига экспорт қилишни йўлга қўйди. Имзоланган шартномага кўра, компания 2025 йил феврал ойи охирига қадар 20,000 силиндрли блокларни экспорт қилади.

Янги қуйиш цехи алюминийни қайта ишлашнинг барча босқичларини қамраб олади: эритиш, юқори босимли қуйиш (HPDC), бўяш, бирламчи ишлов бериш ва юқори аниқликда ишлов бериш. Алюминий силиндрли блокларни эритиш жараёнини ташкил этиш ва уларга юқори аниқликда ишлов бериш компанияга импортни йилига 24,7 миллион долларга камайтириш ва йиллик ишлаб чиқаришнинг умумий қийматини 4,7 миллион долларга камайтириш имконини беради. 2022-2023 йилларда UzAuto Motors Powertrain 66 квт (89 от кучи) CSS Prime 1,2 LIF атмосфера двигателлари ва 99 квт (131 от кучи) Turbo двигателларни йиғиш ва қайта ишлашни йўлга қўйди. CSS Prime лойиҳасига 160 миллион доллар сармоя киритилди, бу йиллик 415 000 ички ёнув двигателларини ишлаб чиқариш ҳажмига эришиш имконини беради.

Шу ўринда таъкидлаш керакки, Силиндр блокларини локализация қилиш лойиҳасининг муҳандислик кўмаги Rheinmetall AG (Германия) ва Huayu Automotive Systems Co. Ltd. қисми KS Huayu AluTech GmbH томонидан тўлиқ қўллаб-қувватланади (HASCO, Хитой).